...

Kabzaa: రెండు రోజుల్లో రూ.100 కోట్లు.. ఉపేంద్ర ‘కబ్జ’ ఫేక్ లెక్కల దుమారం

kabzaa fake collections

సినిమాల రికార్డులను ఒకప్పుడు అవి థియేటర్లలో ఎన్నిరోజులు ఆడాయి అనే అంశాన్ని ఆధారంగా చేసుకుని చెప్పేవారు. ఒక సినిమా 50 రోజులు ఎన్ని సెంటర్లలో ఆడింది.. 100 రోజులు ఎన్ని సెంటర్లలో ఆడింది అని అడిగేవారు. కానీ, రానురాను లెక్కలు మారాయి. సినిమా ఎన్నిరోజులు థియేటర్లలో ఆడింది అనే విషయాన్ని పక్కనపెట్టి ఎంత వసూలు చేసింది అనే అంశాన్ని కొలమానంగా పెట్టుకున్నారు. అందుకే మొదటి రోజు ఎంత వసూలు చేసింది.. మొదటి వారం ఎంత రాబట్టింది అనే లెక్కలు పరిగణనలోకి వచ్చాయి. స్టార్ హీరోల ఫ్యాన్స్ కూడా వీటినే ఇష్టపడుతున్నారు. వీటి కోసమే కొట్టుకుంటున్నారు.

బాక్సాఫీసు కలెక్షన్ లెక్కల గారడి వచ్చిన తరవాత ఫేక్ కలెక్షన్స్ విమర్శలు కూడా బాగానే వచ్చాయి. టాలీవుడ్ స్టార్ హీరోలు నటించిన చాలా సూపర్ హిట్ సినిమాలకు సంబంధించిన బాక్సాఫీసు లెక్కలపై ఇప్పటికే ఫ్యాన్స్ మధ్య వార్ జరుగుతూనే ఉంటుంది. మీ లెక్కలు ఫేక్ అంటే మీ లెక్కలు ఫేక్ అంటూ సోషల్ మీడియాలో దుమ్మెత్తి పోసుకుంటారు. అయితే, వాటన్నింటికీ బాబులాంటి ఫేక్ లెక్క ఒకటి ఇప్పుడు వచ్చిందని సోషల్ మీడియాలో బాగా ట్రోలింగ్ జరుగుతోంది. ఆ లెక్క ఎవరిదో కాదు.. కన్నడ రియల్ స్టార్ ఉపేంద్ర పాన్ ఇండియా మూవీ ‘కబ్జా’ (Kabzaa)ది.

ఈనెల 17న ప్రేక్షకుల ముందుకు వచ్చిన ‘కబ్జ’

ఉపేంద్ర హీరోగా కిచ్చా సుదీప్, శివరాజ్‌కుమార్ అతిథి పాత్రలతో ఆర్.చంద్రు దర్శక నిర్మాణంలో రూపొందిన భారీ చిత్రం ‘కబ్జ’ (Kabzaa). గ్యాంగ్ స్టర్ నేపథ్యంలో యాక్షన్ డ్రామా తెరకెక్కిన ఈ సినిమాను పాన్ ఇండియా లెవెల్‌లో విడుదల చేశారు. ఈనెల 17న ‘కబ్జ’ ప్రేక్షకుల ముందుకు వచ్చింది. కర్ణాటక విషయం పక్కన పెడితే మిగిలిన భాషల్లో ఈ సినిమాకు ఓపెనింగ్స్ కూడా సరిగా లేవు. ఇక తొలిరోజు డిజాస్టర్ టాక్ తెచ్చుకుంది. సినిమా అస్సలు బాగాలేదని.. ‘కె.జి.యఫ్’ రేంజ్‌లో తీద్దామని చెత్త సినిమా తీశారని ప్రేక్షకులు, విమర్శకులు అన్నారు. కానీ, చిత్ర యూనిట్ మాత్రం నిన్న బెంగళూరులో సక్సెస్ సెలబ్రేషన్స్ చేసుకుంది. ఉపేంద్ర, ఆర్.చంద్రు మిగిలిన చిత్ర బృందం అభిమానుల సమక్షంలో కేక్ కట్ చేసి సంబరాలు చేసుకున్నారు.

తొలిరోజు రూ.26 కోట్లు.. రెండు రోజులకు రూ.100 కోట్ల గ్రాస్ అంటూ పోస్టర్లు

ఇక్కడ వరకు బాగానే ఉంది. కానీ, ఈరోజు మేకర్స్ విడుదల చేసిన పోస్టర్ తీవ్ర దుమారం రేపుతోంది. ‘కబ్జ’ సినిమా రెండు రోజుల్లో రూ.100 కోట్లు వసూలు చేసినట్టు పోస్టర్ ముద్రించి వదిలారు. అయితే, ఇది పక్కా ఫేక్ అని చాలా మంది విమర్శిస్తున్నారు. ఇప్పటి వరకు ఫేక్ లెక్కలు చూశాం కానీ.. మరీ ఇంత దారుణమైన ఫేక్ లెక్కలు సినిమా చరిత్రలోనే మొదటిసారని దుమ్మెత్తి పోస్తున్నారు. తొలిరోజు రూ.26 కోట్లు వసూలు చేసినట్టు పోస్టర్ వదిలిన మేకర్స్.. రెండు రోజులకు ఏకంగా రూ.100 కోట్లని వేసేశారు. అసలు ఇది ఎలా సాధ్యమని చాలా మంది అడుగుతున్నారు. అసలు తొలిరోజు లెక్క కూడా తప్పే అని ఇంకొందరు అంటున్నారు. 

కర్ణాటకలో ఈ సినిమా రెండు రోజుల్లో సుమారు రూ.16 కోట్ల మేర గ్రాస్ వసూలు చేసిందట. ఇక అన్ని భాషల్లో కలుపుకుని రూ.20 కోట్ల కన్నా ఎక్కువ ఉండదని అంటున్నారు. అలాంటప్పుడు మరీ దారుణంగా రూ.80 కోట్లు అధికంగా ఎలా వేసుకుంటారని ప్రశ్నిస్తున్నారు. దీనికి తోడు కన్నడ ఇండస్ట్రీకి గర్వకారణమైన మరో సినిమా అంటూ ప్రచారం చేసుకోవడాన్ని కూడా తప్పుబడుతున్నారు. అయితే, కొంత మంది కన్నడ సినీ ప్రేమికులు, ఉపేంద్ర అభిమానులు మాత్రం ఈ విమర్శలను తిప్పికొడుతున్నారు. ‘కబ్జ’ సినిమా అద్భుతంగా ఉందని.. రెండు రోజుల్లో రూ.100 కోట్లు వసూలు చేసే సత్తా దీనికి ఉందని అంటున్నారు. మరి ఈ ఫేక్ లెక్కల వివాదంపై చిత్ర యూనిట్ స్పందిస్తుందో లేదో చూడాలి.

Share this Article
Leave a comment
Seraphinite AcceleratorOptimized by Seraphinite Accelerator
Turns on site high speed to be attractive for people and search engines.